Chatuchak (Closed)

趁虎豹別墅停運之前同朋友去參觀下，去之前就喺希慎食lunch先，行左一圈見哩間泰國菜幾吸引又唔貴，就試下佢啦。所有飯麵都係六十幾蚊有交易，另外仲可以優惠價追加小食同飲品。落單俾錢之後，店員會俾哩個電子籌，等叫籌就可以出去取餐。泰式乾炒牛河($64) - 炒河用左粗河粉，河粉唔會太厚，本身都夠味同唔會太油，炒河可以跟豬牛雞，我地揀左牛，牛肉份量對版，口感都唔會太鞋，加埋辣醬食都幾正。冬陰功豬扒湯麵($64) - 冬陰功湯麵酸多過辣，辣度大約只有小辣程度，非常惹味。豬扒都幾大塊，已經預先切開方便食，肉質唔會太韌太鞋。河粉幾薄幾滑，上面仲有好多芽菜同通菜添！炸蝦餅 & 春卷(跟餐加$24/兩件) - 炸蝦餅炸皮唔會太厚太硬，蝦肉扎實，蘸甜酸醬幾好食。炸春卷仲係脆嘅，入面帶少少QQ 感。泰式熱情果薄荷梳打 ＆ 泰式香茅荔枝梳打(跟餐加$10) - 兩杯梳打都甜度適中，透心涼得黎梳打味唔會太重，前者有檸檬喺入面，後者都有大大粒荔枝。總結，野食唔錯，份量都好足，黎開希慎搵食非常值得一試。