龍津美食 (Closed)

大埔富善邨街巿喺一個冇冷氣舊式街巿，龍津美食唔係場內獨巿，但鍾意佢光猛企理，食物有蓋冚住。煎釀三寶中食過紅腸、豆腐、茄子同尖椒，豆腐最好食，係齋豆腐冇魚肉，炸到外脆內軟，夠香口，遇正剛炸起，好味指數加多分；紅腸唔係切到紙咁薄，亦冇炸到變肉乾。成個食物箱入面，自家製煎餃子最靚仔，見店員埋頭包餃，買兩隻試吓，皮薄饀多，唔會食到油浸嘴唇。小店出品，食完唔會令人覺得驚為天人，勝在經濟實惠款式多，睇得到店東花咗心機去經營。現實喺主打街坊客做十蚊八蚊生意，平日呢個街巿靜英英，又要交租畀領展，希望佢同旁邊的車仔麵檔可以撐落去喇。