薈亞廚房 (Closed)

原來紅螞蟻集團旗下有一間抵食到爆登嘅東南亞菜，昨日做嘢做耐左，三點幾先同朋友去食飯，但仍然見到薈亞廚房好多人食，一睇個Menu發現價錢真係好抵食，於是就同朋友入去品嚐一下。佢哋無論午餐或是下午茶餐都好平好抵食，幾十蚊就食到，包埋嘢飲。我哋叫咗個二人下午茶餐， 加一個廚師推介餐，三個人食都好夠飽啊！二人下午茶餐好豐富，首先小食係揀咗泰式春卷併沙嗲雞肉串，泰式春卷味道唔錯，上枱仲熱辣辣好香脆，沙嗲雞肉串燒得好香，沙嗲醬又夠多，啖啖肉。主菜叫咗番茄肉碎蟹肉湯金邊粉，一上枱大大碗，絕對夠兩個人share，蕃茄湯香濃, 肉碎都多，清清地幾好味。個餐包兩杯龍眼冰，味道甜甜地，裏面有好多龍眼肉架！最後個甜品先正，我完全冇諗過涼粉雪糕杯可以咁大杯，涼粉份量多，椰子雪糕又大大球，中間仲有雜果添！廚師推介餐就叫咗雞絲素翅羹撈飯，加河內烤雞肉，雞絲素翅羹就好似碗仔翅，大大碗裏面再加成碗，撈埋一齊食都幾好食。河內烤雞好滑，有3塊雞扒咁大嘅肉，而且炭燒味十足，我覺得好好食呀！叫咗杯凍奶茶，味道都唔錯，跟餐叫仲有半價添！