薩莉亞意式餐廳 (88廣場) (Closed)

薩莉亞喺日本係大型連鎖，所有主要城市基本上都會搵到。定位係Family Restaurant，即係價錢合理，坐得舒服（以四人卡位居多），有加十幾蚊任飲嘅Drink Bar，適合一家大細求其食餐或中小學生放學去做功課。來到香港，除咗地方冇咁大同等位等得耐之外，基本上都有齊以上特色，而且無入鄉隨俗咁限食飯時間。當然味道就好視乎當地食材質素。餐牌大大本，沙律、意粉、焗飯、pizza、鐵板、小食都有齊。睇過幾次就知佢來來去去都係嗰啲材料：Mozzarella芝士，菠菜，煙肉，番茄汁、白汁。今日健康啲，就要一個pizza加個菠菜。Pizza 係基本嘅番茄底加芝士，同Pizza Hut 迷你批大細差唔多。新鮮焗起嘅芝士係有拉絲效果，番茄底亦唔係淨係茄汁茄膏，食得出有真番茄。要批評的話，隻芝士只係得淡淡嘅奶味，冇乜香味。不過呢個價錢要預咗。菠菜同煙肉係就咁烚嘅，自己加少少鹽同胡椒，份量同味道都OK。