薩莉亞意式餐廳 (新都城大廈) (Closed)

五個人午餐，唔使等位，地方大，枱櫈唔算好密，所以唔算嘈！呢度有樣好，可以自由配撘，大食可以叫多啲，例如加個湯，價錢相宜，彈性好多！每張枱面有個鐘仔，㩒鐘侍應好快有反應，餐具侍應執好用膠兜比我哋，櫃枱有大量調味料，可以自己加！叫午餐包任飲飲品（平時任飲要$12一個人頭），飲品自助出大堂斟，好多選擇（汽水，茶包都好多種味），我揀杯熱莫卡咖啡，平時我唔飲港式茶餐廳咖啡，太濃，莫卡都可以接受，雖然係咖啡機出，朱古力味不太濃，咖啡都幾香！我叫咗卡邦拿尼意粉---意粉好煙韌，有咬口，幾好，好怕啲淥到軟淋淋嘅意粉，不過個汁就一般，忌廉唔夠濃，雖然唔係難食，有幾片煙肉！正常！每人加一件蒜茸包---外脆內軟，焗到熱辣辣，好味！辣味雞翼---大家分享，其實唔太辣，雞翼不太大隻，但骨肉分離，夠熱，好味！水牛芝士薄餅---薄餅尺寸不大，個薄餅底唔厚，一個人都可以KO一個，原個上，要自己切，個薄餅刀好好玩！薄餅面有幾團焗到溶嘅水件芝士，我幾鍾意水牛芝士嘅味道！餐後我沖多杯芒果茶去油膩！雖然茶包，但都幾好味！簡單一餐！每樣食物都熱辣辣上枱，雖然食物同餐牌參考圖片有差別，都係$45，好滿足！