野郎Stone (Closed)

今晚OT到好夜，想對自己好少少，就嚟咗間一人鐵板燒嘆吓。有啲似日本拉麵店咁，門外有自助售賣機，可以用卡買定先，或者入店內用現金俾錢。 大部份部位都熟口熟面，就揀咗平時比較少見嘅翼板。一上枱就覺得塊肉好靚仔，煎到微微金黃，仲有黑椒同蒜片。 本身塊鐵板好熱，食到尾都仲係渣渣聲，所以店家圖文並茂教客人逐塊咁切落嚟燒到想要嘅熟度，不過我比較懶就一次過燒，然後放喺碟上面慢慢食，以免過熟。雖然價錢只係一百頭，不過翼板同我平時係西餐食到嘅靚牛扒差唔多，嫩滑有油香，即使手勢麻麻地，煎到近乎全熟都仲係好腍，牛味濃郁，性價比奇高。轉套餐可以揀飯、意粉或者薯蓉，薯蓉幾幼滑仲有少少飯素調味，可惜原來係冷盤，凍食冇咁飽肚，下次都係揀返飯或者意粉好啲，整體值得Encore。