重光弁当 (Closed)

又嚟到返工搵食時間，有時候買返公司食，但又懶得要喺鋪等，就會APP外賣自取，較啱時間先衝過去，我係慳時間小天才👑 今次揀左重光弁當，第一次食，叫左重光招牌便當($62.4；外賣自取)，計過價錢，外賣自取仲慳左一兩蚊，慳錢小天才👑內容有五格，一陣逐格睇，但佢應該係即刻整，因為一攞上手，個底仲係熱的🔥 膚淺女子鍾意佢整色整水，有條紙帶，外表加分☺️主菜包含炸鱈魚、炸蝦餅同兩件炸雞，不得不講佢炸物做得唔錯，個外衣做到好鬆脆，而且即時整起真係加分好多，我唔鍾意食魚都覺得個魚好好食。蝦餅唔係丸嗰種質地，係會食到蝦肉嗰種🍤 炸雞都肉質都唔錯，但有少少鹹。沙律係用左柚子醬汁，鹹鹹地酸酸地好清新，但如果唔鍾意酸野嘅就可以唔駛試。小菜醃蘿蔔就係平時食到嗰種黃色醃蘿蔔，但係偏甜。星星魚餅、汁煮蘿蔔正常發揮，但實在太少見咁孤獨嘅枝豆，我好蠢咁咬埋個皮，大家可以留意🤓最後白飯係偏粒粒分明嗰一種，有飯素實無死。見識少，第一次食白飯嗰粒梅，一口咬落去好酸，但其實細細啖伴白飯都幾好食🍱