園林閣咖啡室

Open Now

Now Closed

在網上見到有人推介呢間超過二十年歷史老牌酒店嘅自助午餐，話性價比高，收費係成人每位218元，長者190元，無加一，由十二點食到二點半，可以慢慢嘆，心郁郁就同朋友嚟試下。首先，酒店環境尚算舒適， 服務亦親切。食之前先來個巡禮，食物種類一般，唔算多， 但以價錢嚟講，可以接受。沙律區，最基本嘅冷盤肉同海鮮如蝦，青口都冇，淨係得撈咗沙律醬嘅生果同少少沙律菜，同區有車仔麪擋，燒肉檯有燒豬柳，卽焗義大利薄餅，但我祗睇無食。之後熱葷區，有炒菜，魚柳，鴨肉，咖哩雞，旁邊有薄脆，糯米飯等，另有胡椒豬肚湯，猪肚軟嫩好食，但無胡椒味。中湯有青紅蘿蔔湯，蟲草花老鴨湯，西湯就係葡國蝦湯，我衹飲咗西湯，好飲。另外，有壽司（我無食到，唔知好定唔好）及由專人負責切魚生，刺身有驚喜，三文魚，晴魚，鯛魚，希靈魚等都新鮮，味道鮮甜。甜品區，生果有西瓜、菠蘿、哈麥瓜，重有火龍果，細件蛋糕及切餅，芒果布甸，煎堆仔等，亦有專櫃放細杯慕絲，啫哩及凍糕等，雪糕衹得雀巢牌子蓮花杯，無興趣。最後結論是，呢度環境唔錯，侍應服務態度亦好，食物新鮮度，可以接受，無要求可以一試。