萬花紅火鍋酒家 (Closed)

上網搵中環茶樓，搵到呢間，星期日中午試吓。諗住人多，盡早去，約一點左右。去到荷李活道猛搵56A，搵到66，返轉頭，原來要上斜路，早知係士丹頓街落。去到門口，冇乜人喎！正！不過真係好舊式、好少檯、有Ｄup dup。好彩我朝朝早都係去地踎茶樓飲早茶，慣咗。坐低開茶，即有一位阿姐問食唔食盅頭飯，跟住仲建議食多一兩樣點心，幾好介紹。想叫雞......飯，冇。得鳳爪排骨同咸魚肉丙，叫咗鳳爪排骨，係都要雞。再諗多兩樣點心。想叫豬肚燒賣，冇。改叫牛肉波。朋友詳細問咗四式點心係乜，阿姐好有心機答，叫埋。鳳爪排骨飯：好大盅、好夠熱，鳳爪好肉，排骨好夠味，飯底唔太油膩。牛肉波：冇乜肥豬肉，所以有Ｄ硬淨，真材實料。四式點心：有糯米飽、燒賣、韮菜餃及粉菓。點心好夠味道，皮好薄，食物算認真。行完山好頸渴，連埋青島，共$90，抵。