紅磡冰室 (Closed)

上完堂，肚餓到一個點，行經紅磡冰室俾佢個招牌吸引左，決定一試。望住餐牌，花多眼亂，最後揀左常餐，貪佢咩都有啲。多士加炒蛋-厚多士烘到外脆內軟。個人最愛食法係撒上沙糖，當咸香嘅牛油遇上沙糖併發出難以形容嘅滋味。炒蛋好滑，好香牛油味，夾落多士一齊食，味道都好正。會揀常餐另一原因係俾佢menu上面呢個瑞士雞翼撈公仔麵吸引到。上枱熱騰騰，香氣撲鼻。雞翼好入味，肉質嫩滑。公仔麵煮得剛剛好，唔會太稔，瑞士汁均勻分佈喺每一條公仔麵上，食落味道濃郁。最後飲埋跟餐嘅奶茶，真係飽到上心囗。整體而言，佢嘅質素高過一般嘅茶餐廳，而且每碟都大大件。價廉物美，佢當之無愧。