Red Lobster (Fashion Walk) (Closed)

睇介紹就唔可信，親身去試一試先知道實際情況係點！專程避開中午放飯人流，下午兩點幾去到都要等半個小時先有位。唔講咁多即刻介紹下啲大蝦味道係點啦！.呢個自助餐$198有六款唔同嘅主菜你揀， 第一樣先揀咗夏威夷椰子蝦同埋大蝦意粉配龍蝦醬先。 炸到金黃色嘅椰子蝦雖然食落有少少乾身，但係加上椰絲同少許菠蘿粒係面一齊食，感覺幾特別。 至於個龍蝦醬意粉個味道就比較淡，不過意粉煮得唔錯，唔會好淋好散同易斷。.輪到招牌蒜蓉蝦同埋爆谷蝦， 我完全諗唔到佢嘅招牌蒜蓉蝦係點招牌法，一啲蒜蓉味都食唔出，淨係feel到好油， 不過蝦肉食落都算結實。至於個爆谷蝦真係除咗賣相特別之外，我唔係好建議大家食，炸得太乾身之餘仲要好細粒。.最後係烤大蝦， 我覺得係咁多款入面最好食嘅一款。起碼啲蝦配埋佢嘅醬汁一齊食味道唔錯，同埋食落知道自己係食緊蝦，我都食咗好幾串。.你話抵唔抵就見仁見智啦，值唔值得試都好睇你有冇錢呀。不過如果畀咁嘅價錢應該有更加好嘅選擇。