EFG Eat for Green (Closed)

入到去坐低8:00得一台客，都覺得少少伏，坐低咗好耐侍應都冇過嚟落單，走咗入去廚房好耐，大聲嗌咗一聲落單，都等咗一陣先出嚟，出到嚟仲要走去收銀度整一輪嘢先過嚟落單，落單期間侍應個好似皮笑肉不笑，個眼神好似鄙視人咁，仲要連一杯水都冇送過嚟。叫咗三個主菜加兩個$38要咗兩個set連沙律餐湯飲品，等咗差唔多半個鐘先嚟咗一份主菜厚切豬扒，問佢要沙律醬，侍應問返我我哋要乜嘢沙律醬，最尾食晒啲主菜，沙律餐湯飲品一樣都冇上過，主菜味道都係麻麻哋，份量唔多，唔值呢個價錢。到走嗰一刻沙律餐湯飲品依然冇。直接埋單走人。埋單時完全冇print單俾我哋睇，直接就話收幾錢，我哋叫佢print單，睇單嗰陣時，照收咗我哋兩個$38套餐，同佢講前菜全部冇嚟，先話扣返俾我哋。臨走時先見到收銀後邊原來有一大堆水杯同水係供應比食客。總結嚟講，食物質素麻麻，侍應態度麻麻，嘢食等好耐，成件事感覺好差。仲要收咗+1服務費。全程其實個侍應都走左入個廚房度，因為成間餐廳得一個侍應，所以其實等於冇服務。