爺爺雞煲皇 (美景街) (Closed)

今晚同同事兩枝公都唔駛返歸陪老婆, 同事建議去佢屋企附近食返餐雞煲, 反正由佢屋企有直接巴士返到我家, 我地一收工就到北角搭船去位於土瓜灣呢間爺爺雞煲皇 。😙爺爺雞煲皇位於土瓜灣美景街, 由九龍城碼頭行大概8分鐘左右就到。餐廳有別於附近嘅食店, 門面比較光鮮, 店內裝修亦都非常乾淨企理。由於同事係呢度嘅常客, 食物當然由佢發辦, 我地先食左餐廳招牌爺爺雞煲, 食完再點火鍋配料打邊爐。😁胡麻冰菜 雞煲預備緊嘅時間, 同意點左碟胡麻冰菜, 冰菜以冷盤上, 味道清爽, 加上酸酸甜甜嘅胡麻醬, 味道醒胃。👍自家製炸響玲 炸魚皮  由於我地兩個人怕點一份炸魚皮太多, 店員好貼心咁建議我地轉做雙拼, 餐廳自家製炸響玲同炸魚皮由於係現炸, 非常香脆, 特別係炸魚皮, 確係非常惹味可口。😋爺爺招牌雞煲(半隻) 雖然只係點左半隻雞, 不過呢個爺爺招牌雞煲份量都超級多, 雞肉嫩滑, 我地揀左少辣, 辣度剛好, 連洋蔥都好入味, 我地好快就將雞肉食清光之後加湯打邊爐。😋手切肥牛(細)到火鍋店打邊爐最緊要當然係肥牛啦, 呢度嘅手切肥牛油脂分佈均勻, 口感超軟腍, 牛味香濃, 細碟份量都唔少, 兩個人食剛剛好。