居食屋「和民」 (Closed)

又黎到中環，當然係揀和民食啦，價錢係中環黎講真係平民價！我地等左大約5到10分鐘就已經有位，真係比想象既黎得快，沿路行入去都會不斷聽到待應用日文嗌歡迎光臨，果然係日本餐廳，總係會比到人好有禮貌既感覺。雖然餐牌上選擇好多，但作為常客，我地會快手就嗌左個石鍋鮭魚親子飯同埋石鍋咖哩肉醬飯。例牌前菜都係類似韓式既粉絲，味道酸酸甜甜食完真係開胃。前菜都未食完正餐就上啦！先講下石鍋鮭魚親子飯，鐘意食三文魚飯既，依道菜就唔會令你失望啦，都係一般三文魚飯既水平以上，但重點係，話明「親子」，咁「子」呢？真係食完到搵唔到一粒魚子啊！依道三文魚飯，有沙律係面，比一般只有鼓油做醬汁既口感同味道都黎得更特別，加上係石鍋我等左陣先撈所以都食到飯焦。之後係石鍋咖哩肉醬飯，依個配搭都幾特別，先係辣既咖哩同酸既肉醬食起黎味道比想像中配合，雖然蕃茄都佔好多，但咖哩味並無因此而失色，總括都係中上。大家不妨試下！