台灣麵

Open Now

Now Closed

週六返半晝，放工經過見到荃灣原來都有台灣麵嘅分店，印象中佢哋嘅食物質素唔錯，價廉物美，決定喺到食個午餐。嚟到嘅時候已經係下晝兩點，餐廳門口依然人頭湧湧，還好唔算等得耐，大概十分鐘左右就可以入座。食物選擇幾多，主食亦有唔同嘅配搭，我最鍾意佢嘅雙併餐，一個價錢可以一邊揀飯一邊揀麵，唔使心大心細。最先送上嘅係肉燥時菜，配搭嘅係油麥菜，肉燥味道香濃，加入肉鬆令口感層次更豐富，非常百搭。花枝丸外皮炸得酥脆，入口口感彈牙，而且仲加入花枝粒增加口感，味道鮮甜，沾上偏甜嘅醬汁令鮮味更突出。鹽酥雞外脆內軟，酥脆嘅外皮底下係鮮嫩嘅雞肉，而且非常多汁，配上輕量嘅椒鹽更香口惹味。先生嗌嘅紅燒牛肉麵湯底微辣，味道香濃，牛肉夠哂軟腍入味，配上彈牙嘅麵條，質素唔錯。比較貪心嘅我揀咗雙排雙格餐，一邊同先生嘅選擇一樣，係紅燒牛肉麵，而另一邊就係滷肉蛋肉燥飯，肉燥香濃多汁，撈飯一流，滷水蛋亦非常入味。滷肉半肥瘦，雖然唔算非常軟滑，但勝在夠厚身，而且滷得夠入味。珍珠奶茶奶味香濃，而且唔會過甜，珍珠亦非常煙韌，質素唔錯。餐廳雖然開喺地鐵站附近，但價錢相當公道，叫多幾道小食亦唔會心痛，而且質素唔錯，難怪成兩點都咁多人等位！