和食快餐 (曹公坊)

Open Now

Now Closed

今晚去咗荃灣果頭，荃灣啲餐廳五花八門，而且間間都多人排隊。最後同朋友行咗去曹公坊搵食。我地揀咗和食。一來見佢好平，二兩見都有啲人排，緊排，應該都好食掛，一於試下。等咗兩三個字左右，有得入去喇，入面好細，但都擺咗十幾張枱。鋪四周痴滿餐牌我就揀咗咖哩雞扒飯，日式炒雜菜，太卷，仲有凍檸茶。等左一陣，咖喱雞扒飯嚟到喇。都幾大碗，咖喱同雞扒各佔一半，鋪滿晒成個碗面。我以為佢會係一塊大雞扒，點知呢佢係將塊雞扒切薄咗三塊，再去煎。咁樣雖然會快啲熟但係就冇咁juicy。由於佢塊雞扒冇醃過，所以煎完之後呢就有啲乾。至於咖喱，係日式咖喱嚟嘅。夠哂味，同埋有少少肉絲起入面，淨係食咖喱都唔會太寡。但我就嫌佢咖喱落咗太多粉，所以先會有啲似一嚿嚿咁樣，但係味道都幾好。炒雜菜呢，有洋蔥，冬菇，椰菜，紅蘿蔔再加上日式照燒汁去炒顏色好豐富。炒出嚟個效果相當好，唔會太甜，亦都唔會太‘傑’。啲菜呢好爽脆，好好食。而太卷呢，好似得我哋一台叫過咁樣，個個都會食加州卷咁樣，可能因為加州卷平啲。太卷有紫菜，珍珠米，腐皮，蟹柳，冬菇，仲有蛋。由於有腐皮所以本身都已經夠味唔使點豉油都得。我會加啲芥辣喺面頭，令到味道豐富啲，同埋過癮啲。