Video
Read full review
2013-07-15
18 views
月尾將要出門有遠行，所以趁星期六過嚟金鐘搞簽証，順道就晌Hatsu食個晏先至打道回府。事緣晌FB參與一個試食活動，有幸被抽中喜獲試菜機會。其實，之前曾睇過一啲飲食雜誌對Hatsu嘅相關介紹，知道佢哋晚市除供應一般日本料理之外，更以平民價懷石料理為主打，依然選取季節性食材，無論食物賣相、餐具盛器都講求精緻細膩，只喺有啲地方稍作調整，令一向價格不菲嘅懷石料理變得較為親民，讓更多人有機會品嚐到依種飲食藝術。套餐價位由$800一位嘅「廚師發辦」套餐（Omakase）、$430八道菜嘅「松御膳」、$360、$330……以至$280六道菜嘅「吉列豬扒晚市套餐」可供選擇。由於遷就搞簽証關係，揀食晏就啱時間多啲，所以就一於順道同老婆食番餐富貴版和風定食。懷石料理都講求意境，但以香港地方吋金呎土，鋪租貴到癲，餐廳環境都要稍作配合，不過就依然不失禮。雖然入口門有不少和風擺設，但店子裝潢較接近西式，皮椅木枱，原木配金屬牆身，烏絲燈泡吊燈，屬型格設計。最正近窗一邊都喺落地大玻璃，又唔喺對住旺街，開揚又唔怕被經過途人「眼望望」，整體感覺雅致舒適。題外話，茶壺及茶杯都好精緻，茶壺內嘅玄米茶亦都好好飲！點解叫佢做「
其實，之前曾睇過一啲飲食雜誌對Hatsu嘅相關介紹，知道佢哋晚市除供應一般日本料理之外，更以平民價懷石料理為主打，依然選取季節性食材，無論食物賣相、餐具盛器都講求精緻細膩，只喺有啲地方稍作調整，令一向價格不菲嘅懷石料理變得較為親民，讓更多人有機會品嚐到依種飲食藝術。套餐價位由$800一位嘅「廚師發辦」套餐（Omakase）、$430八道菜嘅「松御膳」、$360、$330……以至$280六道菜嘅「吉列豬扒晚市套餐」可供選擇。由於遷就搞簽証關係，揀食晏就啱時間多啲，所以就一於順道同老婆食番餐富貴版和風定食。
懷石料理都講求意境，但以香港地方吋金呎土，鋪租貴到癲，餐廳環境都要稍作配合，不過就依然不失禮。雖然入口門有不少和風擺設，但店子裝潢較接近西式，皮椅木枱，原木配金屬牆身，烏絲燈泡吊燈，屬型格設計。最正近窗一邊都喺落地大玻璃，又唔喺對住旺街，開揚又唔怕被經過途人「眼望望」，整體感覺雅致舒適。題外話，茶壺及茶杯都好精緻，茶壺內嘅玄米茶亦都好好飲！
點解叫佢做「富貴版和風定食」？因為午市專做定食，最平嘅定食如：豚肉生薑燒定食、鯖魚鹽燒定食、滑蛋天婦羅丼……等等都要收$160，而最貴嘅刺身定食賣到$300，食個晏個人消費動輒花二、三百蚊，絕對唔會喺一般大眾平民所做，相反，富貴人家就視為等閒。午市定食有超過30款選擇，所以定食均包括小缽、蒸蛋、麵豉湯及甜品（或餐飲）。最終老婆揀咗個「汁燒銀雪魚定食」（其實佢未揀我都估佢喺食銀雪魚，因為依個喺佢「飛弗」，近乎每次都點銀雪魚食），而小弟因感天氣實在熾熱，想食得涼快啲，二話不說就瞄準「天婦羅冷蕎麥麵定食」，兩份定食賣相都好有睇頭。
汁燒銀雪魚定食 $190
- 糖漬蘿蔔：一紅一黃，味道帶微甜，但口感超爽脆，就咁送飯我都OK架，好似菜脯送粥啫。- 田園沙律：色彩繽紛，有青椒、紅椒、車厘茄、粟米、青瓜、青豆、沙律菜，拌千島汁，入口食得出啲蔬菜好新鮮，不過就稍欠和風特色。
- 日式蒸蛋：蛋味唔算好出眾，但質感超滑，面面有鮮冬菇，底下又有鳴門卷，細細哋一小杯都幾好。
- 麵豉湯：麵豉味都挺濃郁，飲落幾香。- 汁燒銀雪魚：足有兩大件，感覺非常抵食，而且外觀燒得頗靚，入口既嫩滑又多汁，魚皮煙韌有咬勁，感覺幾有趣。粉紅嗰條喺酸薑條，酸酸辣辣挺刺激。
- 米飯：店家選用秋田縣出產嘅美人米，晌門口仲放有多包實物以示貨真價實。飯粒食落的確柔韌黏糯，不過，個人感覺唔及泰國米嗰種咁有飯味。天婦羅冷蕎麥麵定食 $180
- 天婦羅：粉漿夠晒薄，所以天婦羅入口唔油，咪睇佢細細碟，有四季豆、茄子、冬菇、南瓜、雞脾菇、海老咁多款，除海老有成3隻外，其他喺只有一件。個人覺得啲天婦羅幾好食，一啲都炸得唔乾身，又有食材本身嘅味道，尤其南瓜、雞脾菇、海老，最啱食。
- 蕎麥麵：最欣賞喺盛蕎麥麵個碟，好有特色。灰白色麵條內帶有點點芝麻碎，雖然份量頗多，但麵質稍嫌有啲腍，食唔出爽口嘅感覺。
- 鰹魚汁：蘸蕎麥麵嘅鰹魚醬油汁，伴上蔥花、日式芥未，可隨個人喜好加多加少，有啲店家仲會提供埋薑蓉添。個汁加咗蔥及芥未後，淡口嘅蕎麥麵蘸咗鰹魚醬油汁，口感又清涼，又鹹鮮。
據知食完麵淨番個醬汁，喺可以加啲蕎麥麵湯，拌勻飲晒就最正，不過，似乎Hatsu就好似無咁嘅服務。定食包甜品或咖啡，我哋兩個餐就各要一款，試試兩者水準又會喺點。
甜品
只得綠茶雪糕一款，綠茶味幾香濃，雪糕內裡食起嚟仲有少少冰粒，又唔算好幼滑。曾問過店員喺咩牌子，都只喺回覆本地品牌，雀巢？維記？定阿波羅呢？以佢個價位，對食物嘅質素要求，仲諗住會喺一啲日本品牌，不過，我都支持本土嘢架，我久唔久都有買雀巢杯裝雪糕食哩！
咖啡個份量都幾迷你，好似飲意大利濃縮咖啡咁嘅份量，真喺一、兩啖已經飲得晒。咖啡味稍薄，亦都唔夠香，都喺食雪糕好過咯。
整體而言，食物質素喺有水準嘅，晌食材上都反映到出嚟，服務亦都唔錯，侍應都招呼有禮，環境亦都舒適幽靜。雖然收費唔平，但明顯目標都喺對準一般中產人士或附近做嘢嘅老細。不過，若有咩特別日子想食豪少少嚟慶祝一番，佢個晚市懷石亦都可以列入考慮之列喎！
Post
