宗像屋 (Closed)

阿妹好早就係網上book咗呢間鋪嘅dinner omakase, 佢只係接受上網預約900幾蚊兩個人。唔接受walk in。嗰日我哋約咗6點，可能太早只係得我哋呢一枱客。咁樣好似自己包場㖭😂。全場得一個員工同埋一個壽司師傅。一個鐘上齊嘢再加埋由員工講解下食物，感覺上時間都係有少少趕。我哋食到最後，下一組客人到咗，我哋仲食緊嘢。場面好似有少少唔知點。講返食物先，成餐飯印象最深刻係個三文魚籽，食落好有柚子嘅清新味，之前係未諗過三文魚籽同柚子可以咁夾，同埋粒粒魚子係口爆開嘅感覺，好正。個蠔就都算可以，但太削，唔够肥美。蝦壽司就蝦肉够彈牙堅大隻，一啖係食唔晒。海膽就有少少苦味。吞拿魚卷油脂分布得好好，食唔到有筋，入口即溶，好味。整體嚟講，呢個價錢呢個質素都算係okay la。