村上鐵板日本料理 (Closed)

今日黎食午市，見佢唔係好貴就入去試下，反正未試看。入去既時候都唔算好旺喎，大概只有半滿多D。佢本應安排左我地坐入邊，點知個侍應又倒瀉野，跟住就叫我地坐另一邊，但係個度好大陣味，抽煙系統麻麻地，我地又要求調位。最後安排左我地坐近門口既位置，不過其實對正冷氣口好凍，但我都唔敢出聲啦。><午市好似有大概10款選擇，我地就叫左一個雜錦魚生飯同埋一個清湯牛肉鍋，就跟麵豉湯同飲品。不過個麵豉湯好鹹呀，而且入面無咩料，得幾塊紫菜，最後我都因為佢太濃味所以無飲哂。雜錦魚生飯其實一D都唔雜錦，我望黎望去都剩係見到三文魚同玉子，其他咩魚生都唔見。間唔中有一兩粒八爪魚出現，不過係靱到完全咬唔到，所以幾乎係無魚生可言。再講佢D飯都唔好食，溫度係微暖，好淋無口感，唔得呀~~~清湯牛肉火鍋係正常既，但就真係好清無咩味，不過眼見個湯底好似好多油咁。佢材料有好多，蟹柳，魚蛋，鳴門卷，金菇，黃芽白等等，全部都唔難食但都唔係特別好食，就係無咩特別啦。主角牛肉過熟，所以又係好靱，而且無咩牛味，雖然明白咁既價錢唔會有好野食，但食落去都真係麻麻囉。雖然價錢係平，不過我都係覺得唔好食幾平都無用，所以唔會有下次啦。