生隆餅家 (Moved) New Location

以前一提起砵仔糕，芝麻卷，定必會諗起深水埗坤記，不過時至今日，呢間店今生今世應該都唔會再幫襯喇，好彩同樣喺深水埗，另一間良心小店都有呢類懷舊中式糕餅賣，而且價錢仲平啲，質素仲高啲添🤗。生隆餅家有超過二十年歷史，由黃先生一家經營，前舖後工場，每日源源不絕供應砵仔糕，芝麻卷，糯米糍，白糖糕，雞屎藤茶果，紅薑皮蛋酥，南乳酥，老婆餅，馬仔，米通，牛耳，蛋散，蝦子花生等傳統小吃。我試過幾款，全部都真材實料，好好味，其中最鍾意芝麻糕，大大件只賣五蚊，芝麻味濃郁又唔太甜 ，好正👍；另外，糯米糍十蚊三個，又係超級抵，紅豆味皮薄餡多，好食到唔停得口🤤，花生味香甜有咬口，都十分唔錯。傳統老店表態唔做黑警生意，實在需要好大嘅勇氣，因為隨時會得失多年老主顧，不過好幾次過到去，都喜見生意滔滔不絕，賣嘢阿姐收錢收到冇停手😆，顧客除咗上咗年紀嘅叔叔嬸嬸外，估唔到都有唔少後生仔女，可見有麝自然香，有好嘅質素，自然會有人支持。