亞來泰菜 (Closed)

剛好阿媽生日，想食泰國菜，細佬就提議一間放假好多人等位既泰國菜，位置係遠少少，在元朗洪水橋，但有車尚算方便。於是一行五人就揸車入去。平日去到都要等一張枱，假日就要預早等位，不過八人以上可留枱。一坐下，叫個生蝦，有十隻，大隻，好味。再來木瓜沙律，清新夠辣。泰式鳳爪，一上枱第一啖以為唔夠味，撈均後先發覺辣味回甘。炒個耶菜苗，好好食，好新鮮，夠鑊氣。大冬陰公湯，不過不失，正常水準。豬手就真係值得一試，入味，夠林，皮香，汁濃。海南雞一隻，有雞味，唔鞋。麵包黃咖哩牛肉，食完個包仲要叫個白飯，好惹味。胡椒泰式豬肉，一上枱我口水已流出來，真係好香。最後叫左芒果布丁同椰青糕，爽甜清新。成餐飯仲叫左三支星哈啤酒，埋單唔洗一千，去邊度搵。