郭仔記粥麵專家

Open Now

Now Closed

今日黎到大埔墟掃平貨，晏晝正煩緊食咩好個陣就見到依間郭仔記，見到有篤魚蛋嘅車仔，又有唔同款嘅小食、車仔麵、粥品、粉麵，價錢仲好平民，於是二話不說就入咗黎食~好耐都冇食車仔麵，緊係試番碗。以2餸1麵起，餸嘅選擇非常多，價錢由$8到$13不等，身為食肉獸嘅我，揀咗牛腩、牛根、牛肚，外加1串辣魚蛋。麵都有唔少款，估唔到有我最中意嘅紅薯粉。最厲害嘅係，醬汁除咗有清湯同腩汁，仲有辣汁、咖哩汁同埋沙嗲汁，啱哂口味較濃嘅朋友。牛腩燘得軟熟入味，牛筋爽滑又有少少黏，而牛肚就有濃濃嘅五香味，估唔到鋪頭仔都可以做出咁高水準嘅牛類。紅薯粉本身冇咩味，配上沙嗲汁就更加入味。最後加埋凍檸茶消暑，真係平靚正，下次一定要試下佢嘅粥品。