阿四車仔麵 (Closed)

唔知大家有無鋪車仔麵癮？可惜好多時車仔麵檔都係細舖，坐得好逼，近排係‪旺角見到呢間麵店‬乾淨企理，枱與枱之間幾鬆動就入去一試，質素又唔錯喎，價錢都經濟實惠，仲係良心小店添。四餸麵(基本係三餸一麵，加餸每款$9)：🍽溏心蛋、滷水腩肉、油菜、蘿蔔米線(腩汁+沙嗲醬)🍽牛筋丸、溏心蛋、油菜、冬菇河粉(腩汁)由於我地想試多幾款，叫左幾個小食share所以碗麵都比較齋，抵讚嘅係每個餸都份量好足，而且款款都幾有水準，無將貨就價。煮溏心蛋時間控制得啱啱好，真係半熟狀態；蘿蔔一碗有三大舊，清甜無渣又夠淋，好少食車仔麵食到咁高質嘅蘿蔔，必叫；腩肉厚切，味道唔錯，不過嗰日有少少煮過龍；冬菇用蠔油炆過好入味，牛筋丸都算彈牙。佢地嘅湯底清清地，沙嗲醬小辣幾香花生味，醬另上呢點好貼心。小食：🍽瑞士雞翼/南瓜薯餅/炸豆腐/炸墨魚卷小食方面，瑞士雞翼甜甜地送麵一流；炸墨魚卷塊腐皮夠薄，唔會好油膩，包住彈牙爽甜嘅墨魚膠，食得岀有墨魚粒；炸豆腐就係平時食到嘅味道；南瓜薯餅就最出色，新鮮熱辣炸起，非常香脆，個餡係滿滿嘅南瓜蓉，黎到一定要試。