肉肉強食 by 鋒膳 (Closed)

呢間港式鐵板餐廳有平靚正鐵板餐，真係大件夾抵食，而且好好味。而家天氣轉涼，成日心思思想食。終於，星期六晚我哋去咗食，叫咗兩個鐵板。加埋$22轉餐，就有羅宋湯、餐包、甜品、飲品，幾抵食。肉眼扒$100我哋揀咗洋蔥汁，配意粉，鐵板夠晒熱，啲汁倒落去果吓好正，不過記得要用餐巾擋住先。肉眼扒我哋揀咗5成熟，有3塊，肉質唔硬，雖然唔係厚切，但係以佢嘅價錢絕對性價比高，佢仲要寫明用紐西蘭Affco牛肉，同埋唔用鬆肉粉㗎。餐廳配菜都有誠意，有翠玉瓜、甘荀、粟米、西蘭花。美式什扒$90什扒有一塊薄牛扒、一塊豬扒、司華力腸、煙肉、一隻雞全翼，一樣有蔬菜配菜。呢個餐最揀選擇困難症嘅人，咩都有，豬扒都唔會柴皮。如果雞翼可以轉埋雞扒就更好。我哋揀咗黑椒汁，好惹味。配嘅薯條好好食，金黃香脆，超粗條的，正！芝士漢堡包$48漢堡包真材實料。麵包鬆軟，有牛油香。漢堡扒超級厚，肉味香，仲有熱溶芝士，配埋清新火箭菜、生菜、蕃茄，比起連鎖快餐廳，呢個好味之餘，食完真係夠晒飽肚。最後跟餐甜品係雪糕、菠蘿啫喱，啫喱仲要配埋花奶，好味。再嘆埋杯嘢飲，真係捧住個肚走。