德興車仔麵

Open Now

Now Closed

無意中睇到“搵食觀塘”介紹呢間位於宜安街街市入面嘅小店裡面平通街嘅12餸車仔面，今日放假又出動試食。地點喺政府街市上層入面，冷氣充足，尚算乾淨，點咗個大招牌麵B -- 因為有12款餸(對有選擇困難同貪心嘅我簡直係恩物 )，以為每樣配料只有一件，但係原來除咗雞中亦同牛丸，其他都有2-4塊。，必食推介:蘿蔔•清甜冇渣; 牛肚•軟冧入味; 魚蛋都屬於本人喜歡嘅大小同質感; 麵煮得爽口冇過龍; 食辣嘅你一定唔可以錯過沙爹辣汁啦，唔會辣到死，但係食到我鼻水流流，加埋杯凍檸茶(+$5)舒服哂! 硬要挑剔嘅就係韮菜餃皮太厚同可能浸太耐爛咗; 炸芝士雲吞浸落湯影響口感，而且唔似即叫即炸產品，味道係可以㗎，最尾有一絲絲芝士嘅甜味。呢個價錢食個12餸車仔麵，小妹真心覺得扺到爛，因為本人嘅細女極鍾意食白蘿蔔，所以仲外賣多一碗淨餸順便試埋車仔麵餸之王--豬大腸。同牛肚一樣好入味，如果腸油可以清乾淨啲會更啱我口味囉。自從領匯出現之後瘋狂加租同以苛刻續約條件逼走小商戶，屋邨平民食店買少見少。雖然係小店，但係人人都好有禮貌，所以一定會繼續幫襯，以延續香港本土小食店嘅生命。