沐白小農 (Closed)

身為芋頭鮮奶控，一直都有聽人講呢間嘅芋頭鮮奶好好飲，於是趁有機會就過黎，一睇Menu有好多選擇（有豆乳選項，非常好！），但都係買返杯大甲芋頭鮮奶（中，常溫，甜度固定，$30）。雖然係甜度固定，不過用飲管攪勻芋泥同奶之後無想像中咁甜，芋頭泥係打得非常綿滑，芋頭味都算香。最令我意外嘅係竟然奶味都非常出，係少數我覺得奶比芋頭香嘅芋頭鮮奶。可惜芋泥打得有D太幼滑啦，個人比較鍾意有少少芋頭粒可以咬下。睇落細細杯咁，但係由於芋頭份量感覺都幾多，所以食量少嘅人可能飲完都會覺飽。