凱富菜館 (Closed)

剛開張時曾到呢到食晏，但發覺係茶餐廳式嘅做法，乜食品都有d，當時叫咗個香茅雞亦飯，但水準真係好普通，所以提唔起興趣再去幫襯。但近日見到夜市改咗，加咗有打冷，於是尋日假期去試下晚飯，睇下水準如何。首先叫咗茶，竟然係用某外地牌子嘅茶包。睇菜牌呢到河鮮都係主打，所以叫咗個欖角蒸廋身鯇魚，另外重叫咗香腸墨魚、欖菜肉碎四季豆同菜甫煎蛋。個鯇魚大概4份1條，真係幾廋，但幾有鮮味，唔係雪咗一排冇嚟味道嘅貨式，加埋葱絲同欖角嘅香味，幾討好，印象唔錯。至於個香腸墨魚，有豆腐同一d花生墊底，份量唔少；香腸當然冇特別可講，但墨魚都幾新鮮，彈牙得嚟唔靭，同埋個滷水幾好味，所以豆腐同花生都好食。而個菜甫煎蛋就真係正：唔太油但煎得夠香，菜甫同肉碎份量剛好，出乎意料好味。個四季豆係一般，但個欖菜真係幾好，唔係剩得個咸字，而係帶有欖香而微甜。三個人叫咗四個餸加埋啤酒粥飯都係$90個人，算抵。而且地方企理同埋招呼都唔錯，街坊菜館算食得過。