春田冰室

Open Now

Now Closed

呢日沿馬頭圍道向土瓜灣方向行，接近兩點嘅時間，見到呢間嘢嘅裝修幾四正，望入去仲有卡位添，一於行入去，試下佢啲嘢得唔得，點知一入去就已經係伏，畀個侍應截住問幾位，知道我係單身一個就叫我坐櫈位，我已經有啲唔開心，但一場入到嚟，又未幫襯過，即管睇吓會唔會係開心大發現，點知結局都係我判斷錯誤。我拎住件大褸，咁當然揀4人櫈位嚟坐，好嘞，隔咗無耐，又有人入嚟，我又要被搬竇坐兩人櫈位，無計。睇下個餐牌，常餐沙嗲牛肉麵配炒蛋多士都要$54，下午茶要兩點半先至有，唯有叫個午餐試下啦！揀咗萵笋牛肉飯，配熱奶茶，$58。奶茶慣例先嚟，我亦慣例落啡糖，飲落味道正常，無驚喜。至於萵笋牛肉飯就同我要求有好大落差，首先一口咬落牛肉度，就明顯感覺到落咗唔少蘇打粉，不過唔緊要，我明呢個係廚房一貫做法，雖然我唔太喜歡；伏點係起甘筍同萵笋度，兩樣都係爽口，尤其是甘筍，而我就喜歡食腍身。所以呢間餐廳，我諗我唔會再有興趣去試其他，即使佢幾旺場都係咁話。