咖啡韓食 (Closed)

星期六晚上嘅咖啡韓食比平日嘅晚市時間更多人，員工顯得相當忙碌，我地揮手揚聲幾次都未有人得閒幫我地落單。不過韓國人老闆見到員工做得唔好個陣都會向我地道歉，有啲窩心。首先上左紫菜飯捲。都明白餐廳人手唔夠，忙中有錯，本來係叫左芝士紫菜飯捲，最後上左傳統紫菜飯捲，所以有少少失望。飯捲份量足夠，黃蘿蔔好好味，不過有一兩件飯捲比較易散開。牛肋骨湯飯嘅牛肉肉質好好，不過今日湯比較淡，撈飯個陣都係冇咩味。蜜糖芥末炸雞半份當小食剛剛好，醬汁十分惹味。雖然同行友人食左雞胸覺得麻麻，我食到雞翼又覺得唔錯。泡菜餅嘅份量好似比以前大份，裡面嘅泡菜好爽口好食，不過今日似乎比較多粉，食完覺得好飽肚。飲品叫左藍色檸檬梳打 同 蘋果柚子梳打。兩杯都幾甜吓，藍色檸檬梳打比較似平時外面嘅梳打飲品，蘋果柚子梳打嘅蘋果味好特別。今日嘅水準比以前差咗啲，但都明白假日晚市比較多人所以難兼顧。希望佢地之後有多返啲人手，令到水準可以去返之前咁啦。