Soul9+ (Closed)

喺北角想搵間四正啲嘅西餐食下都唔容易，呢間位於錦屏街嘅Soul 9+雖然舖頭細細，但食落都幾有驚喜。首先叫左個煙燻海膽玉子燒，一上枱時用蓋蓋住，侍應話要一陣先打開。到打開時有啲煙冒出來，夾起玉子燒聞一聞，好大陣煙燻味呀，食落啲蛋仲好滑好甜，同出面食嘅日式玉子燒好唔同。跟住再叫個意大利紅醬水牛芝士薄餅，有好多配料俾你選擇，我就揀挪威煙三文魚片。驟眼睇落去都有7-8片煙三文魚鋪喺pizza上，下面就係水牛芝士，好香嘅芝士味。我最鍾意食呢款pizza，因為條邊又脆又薄，食完唔會太飽之餘，又可以過下口癮！Main course叫左燒美國豬鞍扒配香橙燒汁。呢個豬鞍扒好厚身同肥瘦均勻，咁厚身都可以燒到啱啱好，食落啲肉仲好嫩好多汁，加埋香橙燒汁，好清新好開胃！最後食埋個黑松露海膽鵝肝忌廉芝士意大利飯，喺啲飯上面分別有一份黑松露，一份海膽，一份鵝肝，份量都唔少。海膽鮮甜，鵝肝香脆，黑松露味濃香，一個飯有三種口味，滿足曬貪心嘅我！呢餐飯真係好驚喜好飽，竟然喺北角發現左呢間舖頭細細但啲野食又好正嘅西餐！