譽居

Open Now

Now Closed

康城近期開咗新商場，唯一一間可以飲茶嘅地方就係譽居啦，星期一至五早上仲有孖寶優惠，星期六日都有嘅不過就要早啲起身。一般來講性價比都唔錯嘅，而且喺康城其實你都冇得揀㗎啦😂孖寶既套餐就喺晒上邊嘅相，我自己個人係比較推介狀元及第粥同蝦米炸兩腸，呢一個餐性價比真係好高因為平時食一碗及第粥就要40幾蚊，碗粥包一粒肉丸啦仲有豬潤粉腸豬心，非常之豐富。另外仲叫咗艇仔粥同埋鹹肉糭，艇仔粥就會有魷魚絲同魚片，價錢其實係平過狀元及第粥，不過我自己就比較喜歡食多餸啲粥～另外仲叫咗鳳爪排骨飯同埋粉果，但係我就冇影相啦！不過粉果都整得幾好味而且非常之皮薄，入邊仲加咗我最愛嘅粉葛！😋三個人最後埋單連埋+1同埋茶位總共係$142。睇到依度同你分享一件事啦，如果你本身有入開譽居會員係可以儲積分， $10下次當一蚊用，不過依個會員唔係免費㗎，係要比$50先可以入會，所以如果你唔係成日幫襯佢就唔好入會啦。最後奉上一張正價嘅點心紙俾你地參考吓。