尚興潮州海鮮飯店 (Closed)

屋企人生日，適逢要去西環買嘢，就特登嚟尚興食潮州嘢。早咗少少嚟，雖然要分枱坐，都可以坐埋喺附近。叫咗雞紅、鵝片拼鵝腸、糖醋麵、芋頭炒飯、炸大腸。全部食物都好好味，雞紅好入味好滑。鵝片拼鵝腸有驚喜，就係啲豆腐好滑。芋頭炒飯啲蝦米好香，芋頭好，啲鹹肉好惹味。炸大腸的色澤唔係好靚，不過家人講得啱，出邊好靚嗰啲炸大腸嘅色，應該係有一啲色素。糖醋麵有水準，煎得香脆。最期待係個甜品，雖然冇清心丸，但係啲綠豆好爽。侍應仲介紹我哋落少少金橘檸檬，我就麻麻哋，不過家人都好喜歡。值得一題嘅係所有侍應嘅服務都好殷勤同埋親切，知道我哋係分枱坐，會提供多隻碟俾我哋分數，有啲仲幫我哋分埋。中間不斷加茶，又教我哋點樣食嗰個甜品。然後偷聽到隔離對食物質素有意見，一個好似老闆嘅人出咗嚟試味同埋解釋，仲不斷同對方講唔好意思，仲檢討返個問題，誠意可嘉。