Bluebird Coffee (樂基商業中心) (Closed)

作為咖啡愛好者，我最鍾意周圍搵咖啡店，今日黎到西營盤站對面嘅Bluebird，門口一大個藍色框，一定唔會行過龍。入到黎有個充滿樹葉嘅柱，座位有吧台位亦有圓枱，座位大概10個左右。呢度咖啡師好樂意介紹唔同咖啡嘅特性。呢度除左普通有奶嘅咖啡，呢度亦有幾款用唔同方法手沖嘅咖啡，亦有啲特別調味嘅咖啡，好似花生醬、椰子等。呢度椰子咖啡係用椰奶，而Mocha亦係用無糖嘅靚可可粉。食物方面有三文治、酥皮、芝士蛋糕。呢度嘅食物係店舖老闆手造。我地就選擇藍莓芝士蛋糕（$45），仲有芝士菠菜酥（$37）。咖啡方面，因為我最鍾意香濃嘅口味，我就揀左有兩個shot嘅Flat White（$42），而朋友就揀左Peanut Butter Latte ($42)。呢度嘅Peanut Butter Latte飲落唔膩又唔會甜，花生味從奶中淡淡咁散發出黎、啱曬怕甜怕膩嘅人。而Flat White嘅咖啡味夠曬重，夠曬提神醒腦，又有奶脂配搭，夠曬正。芝士菠菜酥嘅芝士咬落軟身又夠味，本身加熱後都夠曬香。而芝士蛋糕亦好大件，本身係硬身嘅紐約芝士蛋糕，餅底微脆，食落都幾飽肚。