龍島 (Closed)

收工想買甜點返屋企一齊食！龍島以前只食過朱古力！未買過蛋糕！門面好企理，光猛乾淨！蛋糕賣相唔錯！$28一件合理（而家西餅真係幾貴都有！一山還有一山高 ）食物只可以外賣，無堂食！入去雪櫃前，店員好nice咁問我要乜，我話揀餅，佢就由得我慢慢揀！之後我叫佢要買四件，一個紙盒剛剛好！店員會問埋要不要叉！會幫我包埋一齊！攞到返屋企打開包裝盒，依然靚仔，每件餅都用膠紙包好！唔會乾！又唔會沾到其他餅，影好相，大家一齊開動！為了食評，我另外三件都食一啖！木糠蛋糕：比較輕，蛋糕鬆軟，味道清爽，唔太甜！栗子蛋糕：栗子蓉好滑，蛋糕鬆軟，唔會過甜！比利時純朱古力芝士蛋糕：蛋糕面一塊朱古力皮，好濃朱古力味！中間一半朱古力，一半朱古力慕絲蛋糕！好滑好味！朱古力軟心蛋糕（60%可可）：呢件我食，蛋糕好濃朱古力味，比較實，朱古力味濃而微甘，大人嘅口味，蛋糕面有朱古力粉，好易揚起，嗆喉！但味道好味！龍島以朱古力起家！所以朱古力味道嘅蛋糕好好味！濃得來唔酸（有啲餅店啲濃度高嘅朱古力會酸）其他兩款其實好味！但水準普通啲！店員好親切，幾細心！可以碌卡！方便！四圍試餅感覺真好！