津津食店 (Closed)

早排大鄉里第一次入梅窩，本身想像自己會好chill地食pizza飲啤酒，點知作為蕃茄愛好者嘅我，一見梅窩呢間食店嘅招牌有啲蕃茄元素，就即刻果斷轉plan！😹鮮茄牛腩湯檬 $58真心覺得好好味！明明只係好簡單嘅材料，但食得出店家的確用左真材實料同心思去煮。首先湯底好清甜，牛腩不但份量多，而且又腍又入味！唔似有啲餐廳係menu度標榜鮮茄，但食落會好明顯食到好多額外調味料嘅味道(;｡□｡;)湯檬會配有青檬另上，店員千叮萬囑我同朋友一定要吱落去一齊食😹原本仲驚會怪怪的，點知加完又真係清爽好味左！(*´◡`)另外佢杯凍奶茶都好飲！不過就會貴少少，因為唔係跟餐的。其實最受歡迎嘅應該係佢星期日限定嘅蟹茄湯檬，不過我去個日唔係星期日，注定同佢無緣喇。好彩我個人其實唔特別中意食蟹，所以佢碗牛腩湯檬已經令我好滿足了，有機會再去都好想encore！當日大部份食客好似都係梅窩居民，佢地嗌嘅亦都唔係湯檬，而係其他茶餐廳菜式，所以我估呢間食店嘅質素係梅窩黎講應該真係數一數二！假日諗唔到去邊，不妨入去梅窩食碗麵，散吓步。