風流居酒屋 (Closed)

今日下午喺OpenRice搵緊今晚食乜好，先知原來大圍有呢一間居酒屋，果度職員好好，一收到我喺網上嘅booking就打俾我confirm，好有效率同清晰。去到發現呢間居酒屋係喺巷仔入面，唔怪得平時行過都冇為意。呢度一行入舖面就係吧檯嘅位置，侍應帶我地上去先發現原來上面都仲有2條樓梯通去唔同嘅房仔。我地坐果間房有3張枱，空間細細，都幾岩兩三個朋友黎傾下密計。而且房入面有mon係駁左日本嘅電視頻道，我覺得氣氛幾好。餐牌選擇都幾多，而且都幾吸引。鹽燒海蝦好抵，30蚊有2串，食落係有膏嘅，而且啲蝦肉結實，應該幾新鮮。翠玉瓜有啲苦，不過係我地唔好彩姐，人地點知果個瓜苦定唔苦。雞皮同雞腎都好食，雞翼係超水準，大隻又好食。芥辣八爪魚軍艦都好食。我地仲叫左個叉燒烏冬，$48，清清地又唔貴。