江南瀨粉 (福榮街) (Closed)

今日去咗呢度食dinner，呢間舖頭出名係食即製嘅瀨粉。我未食過新鮮嘅瀨粉，就係畀呢樣嘢吸引咗就入去食。叫佐一杯豆漿嚟飲，覺得好甜，有冇乜豆味，唔好飲。喺度食瀨粉，就好似叫車仔麵咁樣，逐個逐個餸加，加下、加下，都唔平。我叫咗呢個「清湯鮮製瀨粉」$24 + 魚蛋$6 + 墨丸 $6 + 豆卜 $5。老老實實，魚蛋、墨丸嘅味道，真係好普通，一食就知道絕對係出面廠房交嚟嘅貨，係週街都食到嘅味，仲要係唔好味。個湯底講到出神入化嘅豬骨湯底，但係飲落去都係冇乜特別，而且味道都幾咸。呢度嘅瀨粉話係即製，個質地都幾滑溜，但係除咗話滑溜溜之外，就唔覺有乜嘢出色嘅地方，我覺得有啲過淋。