Paul Lafayet (Closed)

又來甜品餐。Blueberry Cheese Cake正喎。芝士味足夠，算濃，重點係我喜歡佢個質感，好柔滑細膩，唔係好似羅拔臣啫喱嗰種死實實識彈吓彈吓喎（cova既Blueberry Cheese Cake就係咁樣死實實所以唔好食），食咗一小口，芝士很快便在口中溶化，加上薄薄一層消化餅底，整體佳。Tiramisu劣。芝士層係好滑啊，不過無味；而且在濕濕既蛋糕中（疑似浸過酒）完全食唔出酒味。真係好奇咁濕既蛋糕無味，係浸過咩呢？唔通係水？唉，零酒味都算啦，整杯Tiramisu竟然連最基本既咖啡味亦欠，完全唔知自己食緊咩。Cremoso Craquelin綠茶味既cake，但綠茶味淡薄，同Tong Wong既Green Tea Opera無得比，輸幾條街。Lemon Meringue Tart一般。lemon curtard filling甜了點。creme brulee最精彩。食過好多間，都係鐘情Paul Lafayet既。面層焦糖用火槍燒很好靚，薄而脆，用叉拮幾吓，焦糖帶著熱力溶化在充滿雲尼拿籽既香滑冷燉蛋中，冷熱交錯一啖食落肚真係一種享受。埋單計數，得兩款食得過。