Video
Read full review
2015-06-21
684 views
前言寫在最開頭，呢間米線我估真係由佢開張冇耐食到而家，特別係呢四五年呢頭返工LUNCH好多時都食佢，已經熟客到冇得再熟。一開始佢啲米線大碗到我叫少米線都可以食唔晒，早兩年曾經大幅加價，我估就係因為咁搞到無晒客，所以就變咗加少啲但個份量減咗好多。呢個時候我都仲OK，反正自己夠食，同埋近年物價真係貴咗好多，比起佢蝕錢做唔掂執笠我都情願佢咁做。但呢一年佢啲水準真係浮動得好緊要，唔講服務住，我咁多年都係叫中小辣，但有時可以淡如水，有時又會好鬼辣。之但係我都鐘意食辣，同埋佢個湯底隻味比起譚仔合我口味好多，所以我都算啦，又唔係食唔落。咁啱呢次食就真係出事，如常地叫中小辣，等咗一陣就嚟咗一碗個湯係紅色嘅米線。我望咗望都覺得同平時好唔同，但都預咗佢水準唔穩，就諗住照食算數啦，點知食咗一啖係辣到根本食唔落。我叫咗果個矮矮哋、通常都係著裇衫加背心同戴眼鏡、貌似係老闆嘅人話碗嘢好辣根本食唔到，佢問我叫咩辣，我話中小辣。佢就話，「中小辣就梗係辣啦！你下次唔好叫中小辣啦！」哇，我叫咗咁多年中小辣你當我傻架？我話，「我食過好多次中小辣都唔係咁樣，而家係真係辣到食唔到，一係你俾過碗湯我啦。」佢就答我，「無喎，湯要三
但呢一年佢啲水準真係浮動得好緊要，唔講服務住，我咁多年都係叫中小辣，但有時可以淡如水，有時又會好鬼辣。之但係我都鐘意食辣，同埋佢個湯底隻味比起譚仔合我口味好多，所以我都算啦，又唔係食唔落。
咁啱呢次食就真係出事，如常地叫中小辣，等咗一陣就嚟咗一碗個湯係紅色嘅米線。
我望咗望都覺得同平時好唔同，但都預咗佢水準唔穩，就諗住照食算數啦，點知食咗一啖係辣到根本食唔落。我叫咗果個矮矮哋、通常都係著裇衫加背心同戴眼鏡、貌似係老闆嘅人話碗嘢好辣根本食唔到，佢問我叫咩辣，我話中小辣。佢就話，「中小辣就梗係辣啦！你下次唔好叫中小辣啦！」
哇，我叫咗咁多年中小辣你當我傻架？我話，「我食過好多次中小辣都唔係咁樣，而家係真係辣到食唔到，一係你俾過碗湯我啦。」
佢就答我，「無喎，湯要三蚊！」
我真係呆咗，而家你哋問題仲要我俾錢先有碗湯？我話「而家我辣到食唔到喎，咁都要我俾錢？」佢話「係呀！中小辣就一定係辣！你唔食得辣下次就唔好叫中小辣！」
旁邊其他staff都全部聽到晒，但佢老闆咁講當然就唔會有咩其他反應啦。咁啱我隔離枱有兩個女仔都係叫咗中小辣，佢都話佢碗湯唔係咁嘅色，我望咗望佢果碗就似係正常偏淡果隻狀態。
老闆出聲講到咁我都費事為咗一碗米線而喺度嗌交，諗住可能都食得到就無再爭拗落去啦，但食多兩啖都真係食唔到，唯有再同另外嘅staff再講，但係頭先佢老闆都已經講到咁，做細嘅就當然要跟住做，不過果個女staff睇到碗湯都明白係佢地自己有問題，所以都有同我講話不如俾碗滾水我好唔好。
食lunch時間苦短，轉餐廳就一定食唔切，唯有照殺佢啦，不過我最後逐啖逐啖咁放入碗滾水度洗完先食，食完之後果晚我個胃都係唔舒服，好似著火咁。大佬呢個真係唔係唔小心失手嘅程度囉………咁樣都可以唔認錯，呢間嘢我發誓呢世唔會再幫襯。
除咗我本身呢個經歷之外，同場仲加映其他極品服務。佢有另外一張order紙係俾學生填嘅，應該係平三蚊，張紙無放喺枱，要出示學生證再問staff佢先會俾你。有個大大份嘅staff同寫果張紙嘅學生哥用命令口吻話，「寫低你個名、學校名、電話、Whatsapp同Facebook！」大佬我有冇聽錯？你學生證都查咗啦仲寫嚟做乜？另外有個staff都走嚟同佢講話「Facebook唔駛啦！」佢答佢話「得啦你唔好理！」我真係唔知佢哋想點？三蚊我要賣晒我啲個人資料俾你？果日我見佢真係同咗幾枱學生都係咁講。
另外仲有坐位問題，佢間舖話細唔細，好多時佢明明好多空位但都一定要迫人搭枱。咁都算，香港哋寸金尺土，小店係要有效利用空間我都明。果日有啲客應該係咁啱無人帶位自己隨便坐低咗，人哋落單時又係果個老闆去應接，一行埋去就大大聲話個客，「你一個人做咩坐呢張大枱？」個客都呆咗，話佢自己都係見到邊度有位就坐，老闆仲繼續話佢「你一個人坐我咁大張枱我仲駛做生意架？你一個就應該要去同果邊其他人搭枱！」
人哋嚟幫襯你係嚟俾你鬧嘅，呢間嘢都真係了不起。最後個客無理佢繼續坐，個老闆就行出去大聲鬧啲伙記，「你哋一定要同人哋帶位！陣間個個都咁樣亂咁坐我唔駛做生意啦！」
如果係澳牛果隻有人情味嘅老粗我會覺得有親切感，但佢唔係囉！作為一間餐廳，嘢食唔得、服務唔得，仲要係唔得到一個熟客都忍唔到要上嚟寫呢篇嘢嘅程度，我就真係放長雙眼睇吓佢「點做生意」。
Post
