蝦棧 (Moved) New Location

由細到大都好鍾意食蝦，唔少朋友仔都知道。所以今次個朋友就帶咗我去太子一間以蝦為主題的餐廳。睇嚟係年輕人開的小店，門面都幾有特色。一推門就會見到有個大魚缸，裏邊係清一色的蝦、蝦、蝦！座位都幾新淨企理，一坐低店員亦馬上奉上紫薯酥作前菜。原來佢哋係以蝦作乾鍋，乾鍋口味有成十幾款，目不暇給。朋友仔話最好食係奶油蝦同埋鹹蛋蝦，但我就想試吓新野，揀咗避風塘蝦。蝦鍋一上枱嚇親我哋，原來係成個煲湯煲咁大，唔好以為係煲仔菜嗰種煲仔。八隻大蝦整齊排列，全部都都均勻地沾上醬料，一入口好惹味。再咬落去，就是蝦的鮮味，大頭蝦仲有唔少蝦膏添！一場黎到食台灣菜，少不免滷肉飯同青菜。兩樣小菜的份量都唔細。醉雞卷都幾有驚喜，唔知點解佢哋可以做到無骨的效果，啖啖肉令人好滿足。醉雞的酒味夠香夠濃，雞髀亦有雞味，唯一不足係質感稍為硬左少少。最後亦有一個精彩環節，就係我最鍾意的番薯雪糕。番薯雪糕味濃，好似成隻番薯食入口咁，總唔會令我失望。估唔到呢間小店都有得食。我亦試咗一款新味道，就係南瓜雪糕。南瓜雪糕的size驚人，努力左15分鐘都唔能夠完成，建議搵多個朋友仔分享。