Video
Read full review
2013-10-22
326 views
之前已從食友口中聽過對華御結嘅讚賞，咩叫「御結」，咪就喺飯糰囉！平時甚少食飯糰，就算食日本菜亦只喺好偶爾先點份燒飯糰試試，對飯糰嘅認識好皮毛，難得佢搞個試食會，更有創辦人西田宗先生親身解說，變得唔喺單單一個試食會，更喺一個文化學習，認識飯糰嘅分享會，令小弟對「御結」更感到與別不同，點止一舊飯咁簡單！講飯糰之前，不得不講講少少華御結嘅背景，希望唔好介意我賣少少廣告，聽完西田先生一席話，實喺好欽佩佢對日本米嘅熱誠同耐心。原來西田先生晌讀書年代跟米農好稔熟，一心想推廣日本稻米，將真正嘅日本米文化傳揚到其他國家，三年前就憑藉依股熱誠隻身嚟香港創業，並開始以日本傳統家庭料理嘅愛心飯糰「御結」作為主線，成立「華御結」。而且，他認為香港人分辨到靚米，深信：「香港人對食物有要求，唯獨提供真正日本美食及好客之道，方能夠滿足顧客需要。」其實飯糰又喺咩嚟呢？將煮好嘅飯加入喜愛食材，以雙手用心握製而成，兩手相連如人與人心相連，依個咪就喺「御結」嘅意義嘞。西田先生引入日本新潟越光米，直接由農場提供白米，以標籤為各農場標記，確保清楚了解來源及生產過程，時刻掌握大米嘅狀況，再送抵香港先至進行精米處理（去殼工序），米
講飯糰之前，不得不講講少少華御結嘅背景，希望唔好介意我賣少少廣告，聽完西田先生一席話，實喺好欽佩佢對日本米嘅熱誠同耐心。原來西田先生晌讀書年代跟米農好稔熟，一心想推廣日本稻米，將真正嘅日本米文化傳揚到其他國家，三年前就憑藉依股熱誠隻身嚟香港創業，並開始以日本傳統家庭料理嘅愛心飯糰「御結」作為主線，成立「華御結」。而且，他認為香港人分辨到靚米，深信：「香港人對食物有要求，唯獨提供真正日本美食及好客之道，方能夠滿足顧客需要。」
其實飯糰又喺咩嚟呢？將煮好嘅飯加入喜愛食材，以雙手用心握製而成，兩手相連如人與人心相連，依個咪就喺「御結」嘅意義嘞。西田先生引入日本新潟越光米，直接由農場提供白米，以標籤為各農場標記，確保清楚了解來源及生產過程，時刻掌握大米嘅狀況，再送抵香港先至進行精米處理（去殼工序），米粒就可以保持最新鮮度，聽佢介紹，晌佢哋眼中，米粒喺有生命嘅，需要晌攝氏15度嘅恆溫米倉儲存，依個喺最適合儲存米粒嘅溫度，使其進入冬眠狀態，減少呼吸從而減慢氧化過程，依個正正喺「御結」品質維持晌高水平嘅秘密。而且，「華御結」自設工場，堅持即日製造，每日早、午、晚分三轉由工場運送到各分店，西田先生打趣咁講，返工第一件事就喺試飯，晏晝又試，晚上再試，一年可能食咗2,000個御結。所有產品無添加、營養均衡，又絕不留過夜，確保顧客所買到嘅喺最新鮮；仲有就喺配合日本厚生勞動省所倡導嘅「1日30種類食材的健康飲食生活指南」，所以每款口味同配搭均由營養師細心計算，列明卡路里數值（對要控制體重嘅人士，窩心嘅溫馨提示），配合埋沙律、湯水及其他產品，為都市人建立一個健康飲食習慣。此外，為使客人有新鮮感，花年多時間開發逾50種「御結」，每星期輪流提供當中嘅20多款口味，又根據季節而設計不同嘅菜單。
睇睇佢啲單張，飯糰以外（分白米飯系列及調味飯系列），仲有自家製靚湯、健康沙律（$28）、和風單品料理（大：$28，細：$13）、壽司、刺身丼、日式甜品及飲品。題外話，西田先生話調味飯系列即喺混合飯，起初用紫菜包嘅御結唔喺咁合港人口味，算為配合港人喜好，可以話喺佢自創，晌日本無依類御結。佢仲話，日本人本身嘅御結會就咁放晌度，喺香港人較喜歡熱食，先設置微波爐供翻熱。
此外，仲有幾款「營養均衡」套餐，3款套餐A（$39）、B（$49）、C（$59）都以1客自家製靚湯加2個御結為基本，價錢貴啲就自然多啲嘢！
是晚隨我哋任意挑選御結試食，又安排一啲靚湯及和風單品料理。雖然無影相，但嗰個和風豆乳骨膠原雞丸湯真喺幾掂，以雞骨熬個湯底，加入豆乳，色澤濃白，幾鮮甜，幾濃郁，手打新鮮雞肉丸亦都唔錯，所有湯品都分有細（$18 / 12安士）、中（$25 / 15安士）、大份量（$32 / 18安士）。其他試過嘅產品，都同大家分享一下。和風蕃茄豚肉咖喱御結 $15
唔好睇小個飯糰，原來都幾墜手，而包裝經過特吃設計，跟住底下指示就可輕易撕開包裝袋，並用返個包裝袋夾住舊飯糰食，方便衛生。外層嘅紫菜好脆口，咔嚓應聲裂開，而飯粒果然飽滿軟熟，少少黏綿，好食。而主材料蕃茄加咖喱豬肉，配搭幾特別，甜甜哋嘅咖喱中有點清新，豬肉鬆軟。
駿河灣特產櫻花蝦御結 $15、海鮮XO醬御結 $15試過白米飯系列，又試試調味飯系列喺點，一試就兩個。前者調味唔強，為要突出番櫻花蝦，飯糰內佈滿唔少櫻花蝦，幾有口感，但因為無紫菜包住，飯粒食起嚟會稍易散開，幸好用包裝袋袋住食，都唔喺咩問題；不過，小弟反而較喜歡後者，因為以海鮮XO來調味，食嚟既惹味，又鮮香，仲有點點火腿絲。
自家製八爪魚海草沙律 $13雖然佢叫沙律，但唔喺放晌沙律類，而喺細嘅和風單品料理類。盒底喺爽脆嘅海草及清甜嘅青瓜，淋上酸香嘅日式醋汁，健康開胃；而三數片八爪魚切得大大塊，糝少少白芝麻，煙韌有咬口。
鹿兒島魚餅 $13另一款細嘅和風單品料理，外貌有啲似泰式蝦餅，但改以魚肉做，魚餅入口彈牙，不過唔算好突出，唯配上培煎芝兼麻醬汁，有啲提味嘅效果！除以上兩款，細單品料理仲有和風煮茄子、筑前煮（雜菜煮雞肉）、冷枝豆……等等。
和風照燒雞扒 $28屬於大嘅和風單品料理，雞扒大件並煎得金香，淋上傳統風味照燒汁，份外惹味，加上雞扒嫩滑多汁，伴上粟米粒，加個飯糰，足夠當一餐。此外，大單品料理不時輪流出場，計有牛肉豆腐壽喜燒、自家製豆腐雞肉漢堡、雞翼味噌燒、鹽燒鯖魚、大筑前煮……等具特色嘅選擇。
食咗唔少飯糰落肚，甜品就等有機會再試！其實，佢哋都有唔少甜品選擇！
以後應該唔會話人「一舊飯」嘞，因為一舊飯糰咁大有學問，背後亦咁多故事，真喺讓小弟學嘢唔少，亦對「御結」有另一番體會。好衷心希望西田先生繼續努力，讓更多人可以以大眾化價錢品嚐到這種日本傅統家庭料理，令「御結」唔單喺一種食物，更喺使人「兩手相連，人心相近」嘅文化！
Other Info. :
http://h-musubi.com/
(The above review is the personal opinion of a user which does not represent OpenRice's point of view.)
Post
