天魔 (Closed)

有fd食過V city地下嘅天魔，讚性價比高。放工近近地就去食下。店員見到我同bff咁迷惘唔知食咩，就好細心問我地想食意粉定包。（一路食原來都好多人遇到咁嘅難題，店員好好咁逐一問佢哋喜好，作出介紹）。最後叫到成枱美食。千層麵伴隨着啲薯蓉，口感豐富。特別好欣賞佢個肉醬調味得好好，有好濃嘅香草味。面頭仲有烤過嘅芝士。肉醬、薯蓉、千層麵比例完美，唔會膩。韓式XXL三文治，非常厚身，唔可以一啖食晒。餡料好足，有香煎午餐肉、椰菜洋蔥蛋餅、火腿、蕃茄、椰菜泡菜沙律、芝士。最特別係蛋餅，喺眾多爽脆嘅餡料入邊，帶出綿綿嘅口感。連椰菜都有兩個煮法，好有心思。由於有好多蔬菜，所以食落清新。雞翼炸得香脆，醬汁base用咗Tabasco，辣辣地惹味。朱古力Brownie口感濕嫩，唔會太甜。飲品方面，BFF點左冬日之選，暖粒粒嘅紫薯咖啡。面頭有一層紫薯粉好粉嫩，飲落淡淡的紫薯味，唔會喧賓奪主。Dirty，咖啡底唔錯，比較nutty。記住飲嘅時候大啖啲，就可以飲到咖啡同埋鮮奶。估唔到呢間細細餐廳對咖啡都好認真、執着。咁有心嘅餐廳，值得再食。