佳佳粉麵店

Open Now

Now Closed

食車仔麵，最好係多餸揀、少味精、嘆住冷氣食、好味道同埋價錢合理。揸住呢把尺嚟食，開心指數都好高，係第一次嚟嗰陣唔知規矩，有啲迷。規矩就係入到舖頭，唔使自己揾位，店員會編排你坐邊（單拖嚟食，次次都係坐同一個位）；嗌晒餸，唔使自己攞碗麵返埋位，店員收咗你錢後，會送碗麵去到你個位，跟手找錢俾你。心水推介車餸係酸齋（比灣仔的立食店更出色）、咖喱魷魚、鳳爪、雞腎，同埋枱面樽辣椒油。佢同麵檔加的辣汁完全唔同。辣汁唔辣，功能係製造濃香味，想食辣，就一定要加辣椒油，佢唔係好辣，加少少，碗麵都會好味啲。注意返，牛筋係爽筋、豬腸係厚身版、一碗四餸米帶來七分飽、近門口的座位唔係咁涼、老闆偶爾會同熟客以最地道的廣東俗語大聲交談（充滿本土特色）。門口部舊汽水機，貼在牆身的發黃價目紙，都係特色。呢啲懷舊味，會吸引你間唔時返嚟幫襯。