Lab Eat Bistro (豉油街) (Closed)

星期六同男朋友黎到旺角新開既Lab Eat Bistro食晚餐。值得一讚既係食物質素有水準，連服務都係一流，推薦。兩個前菜: 鵝肝燉蛋同迷你漢堡。鵝肝燉蛋配有脆脆既多士，面頭有薄薄既焦糖，唔會黏牙亦唔會搶走鵝肝既味。 迷你漢堡漢堡扒煎到五成熟，幾香口，個包幾鬆軟，細細個好適合做前菜。兩個主菜: 牛腰扒同中式甜酸牛面肉。牛腰扒叫左五成熟配蒜茸汁，見到好靚仔，有牛味之餘都幾軟腍。中式甜酸牛面肉牛面肉好夠腍，中式醬同佢都幾夾，底層鋪住大量綿滑既薯蓉。配菜揀左甜醋糖心蛋同煙肉粒炒椰菜仔。甜醋糖心蛋擺盤好精緻，味道好似薑醋蛋。煙肉粒炒椰菜仔味道都唔錯。甜品係熱窩上的布朗尼配凍冰冰雪糕。欣賞呢到有生日牌同蠟燭既服務，當然布朗尼都好出色。用鐵鑊可以保持熱辣辣，有球朱古力雪糕，加埋朱古力醬仲正。飲品叫左Bacardi Rum同Black Cow。Bacardi Rum好烈。Black Cow可以揀zero，無甘罪惡，雲尼拿雪糕有雲尼拿籽架，好好食。