低調高手大街小食

Open Now

Now Closed

星期日搭電車去筲箕灣, 落車後沿住東大街直行, 見到一間小店門口特別多人排隊。之後上openrice先知原來呢間專賣雞蛋仔同格仔餅嘅小店係好多人推薦。由於呢間小店都幾多人, 所以大概等咗10分鐘先有得食, 如果唔太肚餓嘅話絕對可以接受。叫咗最出名嘅黃金格仔餅, 28蚊一個。未食已經見到格仔餅入面嘅咸蛋黃都幾多幾足料。除咗咸蛋黃, 格仔餅內亦配上適量嘅煉奶。未食之前會覺得呢個配搭都會幾膩, 但食落去發現咸蛋黃同煉奶都好夾, 同埋餅皮中和咗配料嘅油膩感, 所以食落覺得啱啱好。28蚊雖然有啲貴, 但物有所值。另外店員嘅服務態度值得一讚, 會主動幫你將格仔餅剪開一半, 食嘅時候會更加方便。