Primo (Closed)

告士打道由灣仔至銅鑼灣嘅路段其實都有好多高質素嘅餐廳，因為地段關係晚市時段亦唔難搵位，今日一個喺灣仔返工嘅朋友就約咗我嚟呢一間Primo。首先揀咗巴馬火腿蜜瓜卷作頭盤，總共有4件，而且賣相精緻。Parma Ham捲起成小杯狀，再放入蜜瓜同帶有微微薄荷香嘅珠珠，口感清新。熱帶煙三文魚薄餅嘅餅底係佢哋餐廳自家製作，手工薄餅口感果然唔同，而且非常新鮮，而佢嘅材料除咗有煙三文魚外，仲有菠蘿蜜餞同芒果甜酸醬，令薄餅充滿熱帶果嘅味道，而洋蔥、甜椒同埋火箭菜就減去咗薄餅嘅油膩感。另外仲叫咗一個手工意粉，我哋揀咗帶子蝦煙肉卡邦尼醬，店員推介我哋配扁麵條，首先佢嘅份量係超多，就算share嚟食都夠飽有餘，而佢嘅卡邦尼醬汁味道同樣出色，與大大粒嘅原隻帶子、大蝦同煙肉配搭得宜，最重要嘅係佢嘅手工意粉煙韌彈牙夠爽口，絕對值得一讚！原本都打算叫個甜品，但實在份量太多，大家都覺得好飽，所以留待下次再試其他啦！