蕃滿門 (Closed)

以前去九展（即係Emax）睇Show或者睇戲多數去食759車仔麵，後來開左蕃滿門之後真係不二之選！記得想當年得大埔一間舖，朋友帶我去食完一試難忘，除左蕃茄湯，仲有豬手！後來響奧運大食代開分店我都有特登去食（真粉絲！）脆皮咸豬手配川味麻辣蕃茄濃湯 $65必食推介！三隻豬手啖啖肉，皮脆肉嫩，連皮部分有少少肥，點蜜糖芥末醬真係好夾。蕃茄濃湯有蕃茄蓉，清甜，所以川辣我只選小辣，以免蓋過蕃茄味。而這個湯底會搭一件響鈴，但我嫌佢本身浸湯上，唔夠脆。我揀選公仔麵覺得比較掛湯，朋友揀螺絲粉就可以啖啖連湯飲。.除了特色配料，亦有大大碗鎮店推介，其實類似車仔麵，一餸 $49，另加餸 $8-10，或四餸 $68。朋友選了四餸經典原味蕃茄濃湯配螺絲粉，蕃茄搭嫩香滑炒蛋好夾，而且原味湯底亦可選辣度（不過唔知同川味麻辣有無分別），下次我都要揀原味食滑蛋！朋友選了貢丸牛丸龍蝦丸及雜菌，賣相豐富，數一數先知每款丸都有3-4粒，餐廳切半上更覺份量多！粉麵加$3可配冷飲，泡末檸檬茶唔駛自己篤檸檬，正！另外加左個沙拉雞翼 $15，有少少似沙拉骨製法，沙拉醬完全包住炸雞翼，熱辣辣，邪惡得黎又好好味。