Bon Appetit

Open Now

Now Closed

今次食嘅餐廳係一間名叫Bon Appetit嘅私房菜。餐廳位置係尖沙咀柯士甸道花園大廈。由於係私房菜型式，我同朋友都一早電話預約左時間，預約電話係23143008，一早預約左就唔驚摸門釘啦。前菜先有一碗松露野菌湯，飲落去非常足料，菇菌粒粒好多，口感豐富，黑松露嘅味道並無蓋過整個風頭。另外端上一款清新素魚鮮果，素魚用左芝士焗釀表皮，入口香口，食起上黎比起一般魚肉爽彈，加入黑醋沙律同鮮果，非常清新！接住上枱嘅係會令人嘩一聲嘅海鮮塔，第一層有藍青口同翡翠螺，第二層擺放住生蠔，第三層放有帆立貝同鮑魚，兩個人分享就啱啱好！食落去相當新鮮，可以點上檸檬汁同醬汁架。主菜方面有營養豐富嘅三文魚，調味鹹香度剛剛好，外皮酥脆內質嫩滑，加上香草檸檬汁，更加開胃。最後迎來一份甜品🍧火焰雪山非常適合打卡同錄影，記住拎定手機！蛋白嘅口感非常輕盈，火焰做得好靚，入邊有冰凍嘅朱古力雪糕，感覺唔會過分甜膩，最後仲有一杯蜜桃熱情果茶，相當圓滿。