睿海御宴 (Closed)

朋友帶路今日去咗大坑試一試呢間中菜。黃金椒鹽豆腐粒，外皮炸得好香脆，顏色幾好，控制到金黃色，入口豆腐，依然香滑。福建煎蠔烙，煎的口感比較煙韌，有蛋香，中間很多蠔仔及芫荽，送酒一流。金沙吊涌仔，吊桶仔用金莎嘅煮法，一入口鹹蛋黃味湧出嚟，口感仲少少濕潤，非常惹味！籠仔羔蟹糯米飯，餐廳嘅主打菜，打開見到個蟹蓋蟹膏非常之豐富，糯米飯煮得非常軟糯，又好入味，蟹肉夠新鮮彈牙，蟹肉唔會黐殼，非常之好味！陳年花雕雞煲，用上一隻新鮮雞，酒味非常香濃，雞肉見到就知道又香又滑，雞皮又唔會過肥，新鮮嘅雞肉係幼嫩些，最緊要個湯汁都好有雞味，之後一定要打包返屋企，煮米粉一流！柚子炸蝦球，外皮炸得非常薄，又唔會鞋口，彈牙嘅蝦肉配合清爽嘅柚子，唔肥膩，幾啱夏天食。店員推介XO 醬日本和牛炒陳村粉，同乾炒牛河非常類似，鑊氣足夠，個粉底係一塊塊摺疊嘅， 加上XO醬更加香口，當然和牛唔使醃鬆，牛味更突出，入口自然更嫩滑。魚湯雲耳浸菠菜，魚湯非常好味，簡簡單單又好吃，清淡得來食得非常舒服的一個餸。餐廳主打餸都幾好味，又有特式，同埋呢度有啲套餐推介，價錢比銅鑼灣酒樓更合理，食得出係用心的餐廳，值得一試！