坂奈 (Closed)

今日黎左一間好有日式味道既居酒屋，店內座位唔算好多，想去記得book定位。呢度主打係食原條燒魚。一去到師傅問我地有冇咩特別想食。我地話冇，佢就拎左一盤當日新鮮既魚逐一介紹。聽完介紹後，我地決定揀時令魚赤鯥同秋刀魚。揀完之後師傅會立即幫你燒，即叫即做！赤鯥比較罕見，魚質非常嫩滑，油份岩岩好，完全唔需要配汁都好夠味！而秋刀魚都好好食，比一般秋刀魚大條，魚味都好出，魚皮仲燒到好香脆，加少少檸檬汁好開胃！燒魚加$30可變餐，有飯，面豉湯，一個前菜同汁煮物，夠哂豐富。除左魚，我地都加左d小食。包括煙燻羅白芝士，羅白好爽口配厚厚的芝士，估唔到呢個咁特別既組合出奇地夾。另外叫左一碟三隻既燒白貝，好重既清酒味，白貝size都好大，但肉質完全唔硬，燒得剛剛好。整體來說，呢度既食物質素好高，同師傅互動都好多，係同朋友傾下計既好地方。